Töluverður eldur neðan í brúnni
Við fyrstu sýn virðast minniháttar skemmdir hafa orðið á brúnni yfir Lagarfljót, milli Egilsstaða og Fellabæjar, eftir að eldur kviknaði í rafmagnslögn undir brúnni.Ingvar Birkir Einarsson, varaslökkviliðsstjóri í Múlaþingi, segir að svo virðist sem skammhlaup hafi orðið í raflögn sem liggur í stokk undir brúnni.
Útkall vegna eldsins barst klukkan 13:38 í dag. Þegar slökkviliðið kom á staðinn lagði talsverðan reyk frá brúnni auk þess sem smá eldur hafði brotist upp í gegnum brúargólfið.
Ingvar segir fljótt hafa tekist að hefta þann hluta eldsins en meira mál var að ráða við töluverðan eld sem logaði neðan í brúnni. Til þess fékk slökkviliðið aðstoð starfsmanna Isavia á Egilsstaðaflugvelli sem komu á bát og fengu slöngu frá slökkviliðinu til að sprauta á eldinn. Með þeirra aðstoð tókst að ráða niðurlögum eldsins á um 20 mínútum.
Í samtali við Austurfrétt sagðist Ingvar Birkir telja að skemmdir á brúnni væru minniháttar en Vegagerðin myndi meta þær nánar. Við slökkvistarfið þurfti meðal annars að saga lítið gat í brúargólfið til að drepa í glóð sem hafði komist undir það.
Mynd: Aðsend