Tré rifna upp með rótum á Reyðarfirði
Gömul og stór tré hafa rifnað upp með rótum á Reyðarfirði í óveðrinu í dag. Íbúar segjast aldrei hafa séð annað eins og lýsa því hvernig vindurinn þeytir upp öllu lauslegu.„Ég hef búið hér í 33 ár og aldrei séð annað eins. Ég hitti hér björgunarsveitarmann áðan sem er sammála mér,“ segir Gunnar Th. Gunnarsson, íbúi á Reyðarfirði.
Gunnar segist af forvitni hafa farið hring í bænum upp úr hádegi í dag. Þá voru tré farin að rifna þar upp með rótum. „Þetta eru stóreflistré hingað og þangað um bæinn. Á mörkum lóðarinnar hjá mér og nágrannanum er 40-50 ára gömul ösp, um 15 metra há, bol- og krónumikil, mjög falleg. Hún er komin á hliðina, upp að húsi nágrannans. Það er mjög sorglegt að sjá þetta en það er ekkert hægt að gera.
Fjörðurinn minnir helst á rúmsjó. Í einni hviðunni sá ég alls konar drasl koma í uppundir 50-100 metra hæð og fljúga í austur út á sjó. Þetta minnti helst á myndbönd sem maður sér af hvirfilbyljum þar sem þeir fara yfir hús, sprengja þau í tætlur, eiginlega soga þau upp.“
Lögreglan á Austurlandi sendi frá sér tilkynningu um klukkan fjögur þar sem íbúar voru beðnir um að halda sig innandyra og vera alls ekki á ferðinni. Austurfrétt hefur þaðan sagnir af þakplötum á ferðinni og brotnum bílrúðum. Björgunarsveitinni þar hefur borist aðstoð annars staðar úr Fjarðabyggð.
Mjög vont veður er víða á Austfjörðum. „Björgunarsveitarmaðurinn sem ég hitti áðan sagði að það ekkert skárra á Eskifirði, sem er sérstakt. Nú er norðvestanátt og þá er yfirleitt slæmt hér en skárra þar en dæmið snýst síðan við í norðaustanátt. Maður er eiginlega í uppnámi yfir að fylgjast með þessu og veðrið er ekkert að ganga niður.“
Mynd: Gunnar Th. Gunnarsson
