Vonast til að geta komið á rafmagni í Fellum fyrir nóttina
Minnst tíu staurar eru brotnir í Fellalínu eftir mikla ísingu í nótt. Rafmagnslaust er frá Ekkjufelli að Hrafnsgerði og ekki útlit fyrir að rafmagn komist á fyrr en seint í kvöld.
„Við vonumst til að geta hleypt rafmagni á Fellin í kvöld ef ekki finnst meira að,“ segir Guðmundur Hólm Guðmundsson, hjá svæðisvakt RARIK á Austurlandi.
Mikil ísing hlóðst á raflínur í nótt og sló rafmagninu í gamla Fellahreppi út milli klukkan fimm og sex í nótt. Áætlað er að um 40 raforkukaupendur hafi dottið út.
Rafmagn er komið aftur á á Flúðum með því að klippa nærliggjandi eyðibýli frá og á Hafrafell. Ekki næst hins vegar að koma rafmagni á Staffell.
Rafmagn er á Ekkjufelli en síðan eru allir bæir úti þar til komið er að Droplaugarstöðum, ysta bæ í Fljótsdalshreppi að norðanverðu.
„Það eru að minnsta kosti tíu staurar brotnir og einhverjar línur slitnar. Versti kaflinn er á milli Ekkjufells og Kross. Þar er mest brotið og færið erfitt, staurarnir sprengdir ofan í klettana og á þeim er hált.
Þessar erfiðu aðstæður tefja verkið. „Það eru allir útimenn í vinnu og ríflega það. Við náum ekki að hleypa á línuna fyrir kvöldmat, vonandi fyrir nóttina ef ekki kemur meira í ljós.
Við höfum ekki náð að fullkanna línuna. Ef það finnast fleiri bilanir verður hún tekin í áföngum þar við byrjum að utan og vinnum okkur inn eftir.“
Mynd úr safni.