Vopnafjörður: Nýtt vallarhús stærsta framkvæmdin
Nýtt vallarhús verður stærsta framkvæmd Vopnafjarðarhrepps á árinu 2018. Gert er ráð fyrir ríflega 130 milljóna hagnaði af rekstri sveitarfélagsins á næsta ári.Þetta kemur fram í ársreikningi hreppsins sem samþykktur var á síðasta fundi sveitarstjórnar fyrir jól.
Alls er varið tæpum 105 milljónum til framkvæmda á árinu, þar af fara 50 milljónir í byggingu vallarhússins. Næst stærsta framkvæmdin er lagning ljósleiðara í dreifbýli en 28 milljónir eru settar í hana.
Gert er ráð fyrir að tekjur sveitarfélagsins á næsta ári verði rúmur milljarður króna, þar af eru tekjur A-hluta 726 milljónir. Gert er ráð fyrir að hagnaður af rekstri A-hlutans verði 85,5 milljónir króna.
Vopnafjarðarhreppur er meðal best stæðu sveitarfélaga landsins. Heildarskuldir sveitarfélagsins eru 562 milljónir eða 53% af heildartekjum. Gert er ráð fyrir að skuldirnar lækki áfram um 30 milljónir á ári. Á móti er búist við að handbært fé sveitarfélagsins hækki um 45 milljónir á næsta ári.
