15,5 milljónir austur til að ljósvæða strjálbýl sveitarfélög
Djúpavogshreppur er í hópi þeirra sveitarfélaga sem fá hæsta styrkinn af sérstakri úthlutun samgöngu- og sveitastjórnarráðherra til ljósleiðavæðingar strjálbýlla sveitarfélaga.Fjórtán sveitarfélögum er boðinn alls 90 milljóna styrkur auk þess sem níu milljónir í viðbót fara til þriggja sveitarfélaga sem falla undir verkefnið brothættar byggðir.
10,9 milljónir koma í hlut Djúpavogs sem er þriðja hæsta úthlutunina. Húnaþing vestra fær 11,7 milljónir og Borgarbyggð 15,1. Borgarfjarðarhreppur fær 3,1 milljón úr pottinum. Þá fær Breiðdalshreppur 1,5 milljón sem brothætt byggð.
Í tilkynningu ráðuneytisins segir að markmið styrksins sé að bæta samkeppnisstöðu tiltekinna sveitarfélaga gagnvart umsóknum þeirra í samkeppnissjóð fjarskiptasjóðs. Umsóknarferlinum í þann sjóð er lokið og er von á úthlutun á næstu dögum.
Þótt styrkurinn sé ætlaður til framkvæmda árið 2018 geta sveitarfélögin frestað honum um ár sjái þau sér ekki fært að fara í framkvæmdir á árinu.