Héraðslisti, Sjálfstæðisflokkur og Á-listi byrja á að ræða saman
Héraðslisti, Sjálfstæðisflokkur og Á-listi ætla að byrja að ræða saman um myndun meirihluta í bæjarstjórn Fljótsdalshéraðs. Ekki virðist ætla að ganga að koma saman fjögurra flokka meirihluta.Oddvitar allra framboðanna fjögurra sem komu að mönnum í bæjarstjórn Fljótsdalshéraðs funduðu í gærkvöldi um mögulegt samstarf þeirra allra. Þær viðræður hafa skilað þeirri niðurstöðu að möguleikinn sé ekki raunhæfur.
„Menn telja að hugmyndin sé ágæt en það séu ákveðnar hindranir í henni," segir Sigrún Blöndal, oddviti Héraðslistans.
Niðurstaðan eftir fundinn var að Héraðslisti, Sjálfstæðisflokkur og Á-listi, sem eiga tvo bæjarfulltrúa hver, ræði saman um mögulega myndun meirihluta.
„Við sjáum fljótt hvort grundvöllur sé fyrir að ræða áfram saman. Síðan sjáum við hvað gerist í framhaldinu."
Gunnar Jónsson, oddviti Á-lista, segir viðræðurnar „á viðkvæmu stigi." Hans mat er að „ekki sá áhugi fyrir samstarfi allra" og staðfesti að í „morgun hafi verið ákveðið að við myndum setjast niður þrjú.
Aðalmálið er að koma saman starfhæfri bæjarstjórn."
Framsóknarflokkurinn á þrjá menn í bæjarstjórninni. Flokkurinn myndaði meirihluta á síðasta kjörtímabili með Á-lista en upp úr viðræðum þeirra um áframhaldandi samstarf slitnaði á mánudag.
