Ferðafólk flykkist á austfirsk tjaldstæði: Veðrið stjórnar þessu
Fjöldi manns hefur komið sér fyrir á tjaldstæðunum í Hallormsstaðarskógi. Skógarvörðurinn segir júní hafa verið einn þann besta í sögu þeirra en fólk drífi nú að í sólina.„Það kom svakalega mikið af fólki í gær. Einhverjir fóru aftur en það koma aðrir í þeirra stað. Menn ókyrrast ef það dregur ský fyrir sólu," segir Þór Þorfinnsson, skógarvík.
Fjöldi fólks var kominn á tjaldsvæðin í Atlavík og Höfðavík í gær og stöðugur straumur bíla með tjaldvagna og slík hýsi lá inn í Hallormsstað í gærkvöldi.
Þór er einnig ánægður með júnímánuð sem hann segir verið þann næst besta í sögunni. „Við fengum mjög góðar helgar. Það var mikið af Austfirðingum í styttri útilegum. Veðurspárnar voru ekki alltaf hagstæðar okkur en það rættist alltaf úr."
Þór segir það hafa verið reynslu sína að færri séu á ferðinni þau ár sem heimsmeistarakeppnin í knattspyrnu fari fram. Hún virðist ekki hafa haft áhrif í síðasta mánuði.
„Ég held að fólk sé orðið svo vel græjað að það horfir bara á leikina í útilegunni."
Úr Atlavík í gærkvöldi. Mynd: GG
