Þór tilbúinn að kippa í Green Freezer
Til stendur að varðskipið Þór dragi flutningaskipið Green Freezer af strandstað í Fáskrúðsfirði á háflóði á hádegi. Landhelgisgæslan ákvað í gærkvöldi að beita íhlutunarrétti sínum eftir að útgerð skipsins hafði hætt við tilraun til að losa skipið í gærkvöldi.Í tilkynningu gæslunnar frá í gærkvöldi segir að ákveðið hafi verið að beita íhlutunarréttinum í samræmi við lög um verndun hafs og strandar að höfðu samráði við Umhverfisstofnun.
Áhöfn varðskipsins Þórs hófst í birtingu handa við björgunaraðgerðir og er nú komin taug í Green Freezer og beðið eftir háflóði til að kippa því af strandstað. Í tilkynningu gæslunnar segir að skipið verði dregið „á öruggt svæði."
Green Freezer strandaði í Fáskrúðsfirði um klukkan átta á miðvikudagskvöld. Þar sem ekki var talin hætta á ferðum fékk útgerð skipsins tækifæri til að koma með eigin björgunaráætlun. Meðal aðgerða þar var að hafnsögubáturinn Vöttur drægi skipið af strandstað í gærkvöldi. Þegar það gekk ekki eftir greip Landhelgisgæslan inn í.
Minni háttar olíubrák sást í kringum skipið í gærmorgun og voru settar upp mengunargildrur til að hindra frekari útbreiðslu.
Mynd: Þórlindur Magnússon
