Vilhjálmur Jónsson: Væntum þess að kaupin styrki atvinnulífið
Vilhjálmur Jónsson, bæjarstjóri á Seyðisfirði, væntir þess að kaup Síldarvinnslunnar á útgerðinni Gullbergi og fiskvinnslufyrirtækinu Brimbergi efli atvinnulífið á staðnum. Hann telur það skipta máli að um fyrirtæki úr nágrannabyggð sé að ræða.„Bæjarstjórnin hefur ekki fjallað um þetta í dýpt en sú kynning sem við fengum er þannig að við væntum þess að þetta verði jákvætt og styrki atvinnulífið á Seyðisfirði," segir Vilhjálmur.
„Í þessu geta falist tækifæri bæði fyrir samfélagið og fyrirtækið. Síldarvinnslan er öflugt sjávarútvegsfyrirtæki sem hefur verið að styrkja sig."
Bæjarstjórn Seyðisfjarðarkaupstaðar fundaði klukkan níu í morgun með forsvarsmönnum Síldarvinnslunnar og Gullbergs þar sem kynnt var að Síldarvinnslan hefði keypt allt hlutafé í útgerðinni og fiskvinnslunni.
Í tilkynningu sem bæjarstjórnin sendi frá sér eftir fundinn segir að hún vænti þess að með kaupunum og „innkomu eins af stærstu sjávarútvegsfyrirtækjum landsins" muni starfsemin á Seyðisfirði „eflast til framtíðar litið." Á fundinum hafi komið fram að áfram yrði gert út frá Seyðisfirði og lögð áhersla á áframahaldandi framleiðslustörf í sjávarútvegi í byggðarlaginu.
„Eins og þetta var kynnt fyrir okkur þá verður starfsemin óbreytt og jafnvel reynt að bæta í vinnslu í húsinu," segir Vilhjálmur.
Krefjast ekki forkaupsréttar
Kaupin eru tilkynnt með fyrirvara um samþykki Samkeppniseftirlitsins. Síldarvinnslan hefur staðið í dómsmálum út af kaupum á Bergi/Huginn í Vestmannaeyjum en héraðsdómur komst í vor að þeirri niðurstöðu að Vestmannaeyjabær ætti forkaupsrétt að Bergi/Huginn.
Síldarvinnslan hefur áfrýjað því máli til hæstaréttar en bæjarstjórn Seyðisfjarðar ætlar ekki í málarekstur eins og Eyjamenn.
„Við sjáum ekkert tilefni til þess. Hér er aðili að koma inn, kaupir fyrirtæki og starfsemi og ætlar að vera með starfsemi áfram. Ég lít svo á að þetta séu gjörólík mál."
Mjóifjörður skilur Seyðisfjörð og Norðfjörð að. Vilhjálmur telur það skipta máli að fá fyrirtæki úr nágrannabyggð sem þekki aðstæður en Síldarvinnslan rekur fiskimjölsverksmiðju á Seyðisfirði.
„Ég held að nálægðin skapi meiri skilning á samspili samfélags og atvinnu. Síldarvinnslan stendur fyrir rekstri í byggðarlagi sem er ekki óáþekkt en heldur stærra."
Seyðfirðingar hafa um árabil barist fyrir göngum undir Fjarðarheiði og upp í Hérað, fremur en tvennum göngum í gegnum Mjóafjörð til Norðfjarðar. Aðspurður sagði Vilhjálmur kaupin „ekki breyta neinu varðandi göngin."
Þótt bæjarstjórninni hafi ekki verið tilkynnt formlega um kaupin fyrr en í morgun var búið að láta fulltrúa í henni vita hvað væri í aðsigi. Í samtali við Austurfrétt staðfesti Vilhjálmur að þeir hefðu fengið að vita að viðræður væru í gangi seinni partinn í ágúst.
„Ég huga að flestir bæjarfulltrúar hafi gert sér grein fyrir að það væru breytingar í pípunum. Í vor voru hugmyndir um að sameina fyrirtækin hér og þótt sögum um kaupin hafi verið hafnað í fréttum þá hugsa ég að bæjarfulltrúar hafi haft pata af þeim, frekar en vissu."
