Gert ráð fyrir afgangi hjá Borgarfjarðarhreppi
Gert er ráð fyrir ríflega 900 þúsund króna afgangi af rekstri Borgarfjarðarhrepps á árinu samkvæmt nýsamþykktri fjárhagsáætlun. Ráðist verður í endurbætur á félagsheimilinu Fjarðarborg.Gert er ráð fyrir tekjum upp á rúmar 127 milljónir en rekstrargjöld og fjármagnsgjöld nemi um 126 milljónum.
Veltufé frá rekstri er áætlað 10,4 milljónir og fjárfestingar ársins 15,5 milljónir.
Stærsta fjárfestingin felst í endurbótum á félagsheimilinu Fjarðarborg fyrir fimm milljónir. Þá verður ráðist í endurbætur á vatnsveitu fyrir þrjár milljónir og endurnýjun tækja fyrir sömu upphæð.
Þá samþykkti hreppsnefndin að sú fjárhæð sem ekki gekk út úr atvinnuaukningasjóði í fyrra bætist við sjóðinn í ár. Því verða 2,8 milljónir til úthlutunar.
