Seyðisfjörður: Haldið verður upp á afmælið en með alvarlegri blæ
Hátíðarhöld í tilefni 120 kaupstaðarafmælis Seyðisfjarðar hefjast í kvöld. Reikna má með einhverjum breytingum á dagskránni en bæjarbúar eru í áfalli eftir hörmulegt bílslys sem varð þar á þriðjudagskvöld. Rúmlega tvítug stúlka fórst í því og önnur liggur alvarlega slösuð á Landsspítalanum.Afmælisnefndin fundaði í gær ásamt fleirum til að meta framhald hátíðarhaldanna. Í tilkynningu sem send var eftir fundinn segir að ákveðið að ákveðið hafi verið að halda áfram með viðburðinn en slysið hafi þó áhrif á dagskrána.
Þar eru Seyðfirðingar hvattir til að hittast, styðja hvern annan og byggja áfram upp samfélagið sitt við Gamla skóla klukkan 20:00 í kvöld. Samkvæmt auglýstri dagskrá er þar gert ráð fyrir ræðuhöldum og tónlistaratriðum.
Eftir því sem Austurfrétt kemst næst mun afmælisdagskráin halda sér í stórum dráttum en þó getur verið að einstakir liðir breytist eða falli niður.
Ljóst er að banaslysið hefur mikil áhrif á Seyðfirðinga enda margir sem tengjast því náið á einn eða annan hátt.
Í tilkynningu nefndarinnar segir einnig að hún ætli að taka þátt í söfnun Lionsklúbbs Seyðisfjarðar og sjúkrahússins fyrir kaupum á Lucas-hjartahnoðtæki sem skipt geti sköpum á vettvangi slysa. Í frétt frá klúbbnum kemur fram að milljón sé þegar komin í söfnunina en heildarkostnaðurinn sé um 2,5 milljónir.
Reikningsnúmer söfnunarinnar er: 0175-05-070440 og kennitalan: 470483-0249.
