Rafmagn af nær öllu Austurlandi
Rafmagn fór af nær öllu svæðinu á milli Vopnafirði og Breiðdalsvíkur klukkan kortér yfir tíu í kvöld. Ekki er ljóst hvað olli rafmagnsleysinu en unnið er að því að koma rafmagni aftur á svæðið. Klukkan ellefu sló rafmagni aftur út.
Uppfært 00:00
Búið er að koma á tengingu milli Prestbakka á Síðu og Hóla í Hornafirði. Rafmagn ætti því að komast til notenda á Höfn og Djúpavogi innan stundar. Bilun er á línu milli Hryggstekks og Teigarhorns, skammt frá Hryggstekk. Ekki er vitað hvað er að en viðgerðarflokkur á leiðinni á snjóbíl.
Uppfært 23:30
Landsnet segir rafmagn komið til Austfirðinga. Seyðisfjörður og Vopnafjörður eru þó í eyjarekstri
Uppfært: 23:20
Útlit er fyrir að stæða eða stæður hafi brotnað í Eyvindarárlínu milli Hryggstekks og Eyvindarár. ár. Línan er því órekstrarhæf hringtenging ekki lengur til staðar á Austfjörðum. Reynt að veita rafmagni eftir öðrum leiðum, flutningur inn á svæðið fer um línu milli Hryggstekks og Stuðla.
Spennarnir í Fljótsdal eru hins vegar komnir inn. Tíma tekur að byggja upp kerfið.
Rafmagnslaust er á milli Teigarhorns í Berufirði og Hóla, rétt utan við Höfn í Hornafirði eftir að útleysing varð á línu milli Teigarhorns og Hryggstekks.
Uppfært 23:15
Rétt rúmlega ellefu í kvöld varð útleysing á spennum í Fljótsdal. Við það varð aftur rafmagnslaust á Austurlandi en rafmagni hafði verið komið þar á að hluta.
Nokkrum mínútum fyrr varð útleysing á línu milli Teigarhorns í Berufirði og Hryggstekks. Útleysing varð á TE1 milli Teigarhorns og Hryggstekks. Við það varð rafmagnslaust út frá Teigarhorni og Hólum.
Upphaflegt 22:55
Hjá Landsneti fengust þær upplýsingar að ekki væri ljóst hvað hefði valdið rafmagnsleysinu en grunur beindist að bilum í tengivirkinu á Stuðlum.
Samsláttur á línum gat einnig slegið rafmagninu út en einhvern tíma tekur að ná fullri spennu á kerfinu á ný þegar slíkt gerist.
Ljóst er að útleysing hefði orðið á línunum milli Hryggstekks í Skriðdal og Stuðla í Reyðarfirði og milli Hryggstekks og Eyvindarár utan við Egilsstaði.
Því má búast við að smá saman komi rafmagn á þá staði sem ekki eru komnir með rafmagn.
Nóg er að gera í höfuðstöðvum Landsnets vegna rafmagnstruflana víða um land í óveðrinu sem nú gengur yfir. Skömmu áður en rafmagnið fór var Austurland tengt meginsflutningskerfinu á ný eftir að hafa verið í eyjurekstri í um hálftíma. Notendur urðu þá ekki fyrir rafmagnsleysi.
Klukkan átta var kerskáli álvers Fjarðaáls tengdur frá byggðalínunni til að minnka áhættu af hugsanlegum truflunum í flutningskerfinu.
