Á hugmyndin þín ekki viðskiptatækifæri skilið?
Kynningarfundur um verkefnið Ræsing Vopnafjarðar verður haldinn í Kaupvangi á morgun miðvikudag.Nýsköpunarmiðstöð Íslands í samstarfi við sveitarfélag leitar að góðum viðskiptahugmyndum sem kunna að auka við flóru atvinnulífs í sveitarfélaginu.
Einstaklingar, hópar og fyrirtæki eru hvött til þess að senda inn viðskiptahugmyndir og sækja um þátttöku í verkefninu. Dómnefnd velur umsóknir til áframhaldandi þróunar og fullbúin viðskiptaáætlun er unnin, með það í huga að verkefnið sé tilbúið til fjárfestakynningar og reksturs.
Þátttakendur fá 12 vikur til að vinna viðskiptaáætlun fyrir verkefnin sín en á þeim tíma fá aðstandendur verkefnanna mikinn stuðning verkefnisstjóra Nýsköpunarmiðstöðvar við gerð viðskiptaáætlunarinnar og hugsanlega við vöruþróun og frumgerðasmíði.
Katrín Jónsdóttir er verkefnastjóri Nýsköpunarmiðstöðvar Íslands á Austurlandi.
„Allir eru velkomnir og verkefnið er fyrir alla sem luma á góðum hugmyndum. Við fórum af stað með Ræsingu á Fljótsdalshéraði í apríl og þar komu upp sextán hugmyndir. Ég skynja mikinn áhuga hér á Vopnafirði og veit af fjölmörgum hugmyndum sem ættu skilð að líta dagsins ljós.“
Fundurinn hefst klukkan 12:00, aðgangur er ókeypis og súpa í boði fyrir svanga.
Nánar má lesa um verkefnið hér.