Aðeins ein iðnaðarlóð laus til úthlutunar
Aðeins ein iðnaðarlóð er nú laus til úthlutunar á Egilsstöðum og í Fellabæ. Þetta kemur fram í minnisblað framkvæmda- og umhverfismálastjóra um lausar iðnaðarlóðir á Egilsstöðum og í Fellabæ. Lóðin sem er laus er í Iðjuseli í Fellabæ.Málið var til umræðu á síðasta fundi umhverfis- og framkvæmdaráðs þar sem samþykkir voru ýmsar aðgerðir til að bregðast við þeirri stöðu sem fram kemur í minnisblaðinu.
Í fyrsta lagi felur ráðið felur framkvæmda- og umhverfismálastjóra að hefja þegar formlegt ferli innköllunar lóða við Miðás, sem úthlutað hefur verið en ekki hefur verið byggt á. Á þetta við um lóðirnar Miðás 15, 17, 27-29 og 39.
Í öðru lagi felur ráðið framkvæmda- og umhverfismálastjóra að láta stofna iðnaðarlóðir samkvæmt gildandi deiliskipulagi við Selhöfða. Einnig að hefja nauðsynlegan undirbúning framkvæmda á svæðinu, meðal annars með því að láta mæla jarðdýpt á fyrirhuguðum byggingarlóðum.
Í þriðja lagi samþykkir ráðið að óska eftir því við heimastjórn Fljótsdalshéraðs að gert verði deiliskipulag fyrir iðnaðar- og athafnasvæði á hluta af landi Ekkjufellssels, norðaustan hringvegar, sem sveitarfélagið hefur forræði yfir samkvæmt leigusamningi.
Þá samþykkir ráðið að fela framkvæmda- og umhverfismálastjóra að kanna möguleika á gerð nýrra iðnaðarlóða samkvæmt gildandi deiliskipulagi við Brúnás, með viðræðum við landeigendur og, með þeirra samþykki, að láta mæla jarðdýpt á fyrirhuguðum byggingarlóðum.
