Ákærður fyrir að vigta ekki fiskinn í soðið
Lögreglustjórinn á Austurlandi hefur ákært skipstjóra á smábát fyrir að landa um hálfu tonni af óslægðri ýsu framhjá vigt. Hann ætlaði fiskinn handa sér og áhöfn sinni í soðið.
Samkvæmt ákærunni er skipstjóranum gefið að sök að hafa vanrækt að tryggja að 499 kg af óslægðri ýsu væru vigtuð á hafnarvog eins og annar afli bátsins eftir veiðiferð snemma árs 2013.
Ýsan var þess í stað flutt framhjá hafnarvoginni í húsnæði skammt frá hafnarsvæðinu. Þannig reiknaðist sá afli ekki með réttum hætti til aflamarks.
Í ákærunni segir að skipstjórinn hafi ætlað aflann til eigin neyslu, „fyrir sig og skipshöfn sína.“ Hann er ákærður fyrir brot á lögum og reglugerðum um stjórn fiskveiða og umgengi við nytjastofna sjávar.
