Austfirðingar minnst hrifnir af Katrínu
Stuðningur við Katrínu Jakobsdóttur sem næsta forsætisráðherra Íslands er minnstur á Austfjörðum samanborið við önnur landssvæði. Þrátt fyrir þetta er Katrín sá einstaklingur sem flestir Austfirðingar vilja sjá í embættið.Þetta kemur fram í könnum sem Zenter gerði fyrir stuðningshóp Katrínar. Fyrir hópnum fer Berglind Häsler, bóndi á Karlsstöðum í Berufirði.
Samkvæmt könnunni vilja 31,1% Austfirðinga Katrínu sem næsta forsætisráðherra. Meðaltal hennar á landsvísu er hins vegar 49,5% sé horft til þeirra sem tóku afstöðu.
Næstflestir Austfirðingar vilja Sigmund Davíð Gunnlaugsson, oddvita Miðflokksins, sem forsætisráðherra eða 23,5%. Fylgi hans er hvergi meira.
Það er reyndar álíka mikið á Vestfjörðum þar sem Sigmundur er næstvinsælasti kosturinn. Þar hefur Katrín hins vegar yfirburði, yfir 56% aðspurðra nefndu hana og er hún hvergi vinsælli.
Á Austurlandi nefndu 20,9% Bjarna Benediktsson, 12,4% Sigurð Inga Jóhannsson og 12% aðra.