Bæjarstjórnarfundir á flakki
Bæjarstjórn Fjarðabyggðar hefur ákveðið að færa fundi sína að hluta til út í einstaka bæjarkjarna í vetur og sá fyrsti var haldinn á Stöðvarfirði í síðustu viku.
Það var Jón Björn Hákonarson, forseti bæjarstjórnar, sem átti hugmyndina að því að fara með fundina milli staða.
„Þetta verður tilraun í vetur, en við höfum þó annað slagið verið með fundi út í hverfunum, þá í tengslum við íbúafundi, en þó að langmestu á bæjarstjórnarskrifstofunni á Reyðarfirði þar sem þeim hefur verið sjónvarpað beint á netinu.
Ég tel þetta mikilvægt og góða leið til þess að færa bæjarmálin nær fólkinu og auka samheldni. Það er líka gott fyrir okkur bæjarfulltrúana að heimsækja öll hverfi og taka púlsinn á hverjum stað. Nefndirnar hafa verið duglegar að flakka á milli og hafa verið ánægðar með það fyrirkomulag. Við ætlum í það minnsta að prófa þetta í vetur, að fara með annan hvern fund út, sem er þá einu sinni í mánuði.“
Jón Björn segir að vissulega sé lítil reynsla komin á fyrirkomulagið. „Það litla sem ég hef heyrt er bara jákvætt og fólk er ánægt. Allir bæjrarstjórnarfundir eru opnir og því geta íbúar komið á fund í sínu hverfi og viljum við hvetja þá til þess. Þetta verður svo skoðað og endurmetið um áramót en ég er bjartsýnn á framhaldið.“
Ljósmynd/Gunnar Jónsson: Frá vinstri: Páll Björgvin Guðmundsson, Elvar Jónsson, Eydís Ásbjörnsdóttir, Svanhvít Yngvadóttir, Hulda Sigrún Guðmundsdóttir, Valdimar O. Hermannsson, Dýrunn Pála Skaftadóttir og Esther Ösp Gunnarsdóttir.
