Bætt við á Mjóeyri: Fluttu tvö sumarhús yfir Fagradalinn
Tvö sumarhús hafa bæst í kost Ferðaþjónustunnar á Mjóeyri. Þau nýjustu voru flutt frá Egilsstöðum til Eskifjarðar á föstudagskvöld í lögreglufylgd.
Húsin eru smíðuð af MVA byggingaverktökum á Egilsstöðum og rúma vel eina fjölskyldu. Með þeim sem bættust í hópinn á föstudagskvöld eru orðin 10 sumarhús á Mjóeyri og þar með gistipláss fyrir ríflega 40-50 manns.
Sævar Guðjónsson sem rekur ferðaþjónustuna ásamt konu sinni Berglindi Ingvarsdóttur segir að vel sé bókað á Mjóeyrinni í sumar. „Það er þegar töluverð traffík, þess vegna erum við að bæta við.“
Eftir um klukkustundarferðalag voru húsin hífð á sinn stað og komið fyrir á grunnum. Á næstunni verður klárað að tengja þau við lagnir og innrétta. Í samtali við Austurfrétt sagði Sævar að fyrsta nóttin í nýju húsunum væri bókuð í lok maí en mögulega verði byrjað að nota þau fyrr.
Þetta var ekki fyrsta ferð húsanna þar sem annað þeirra lagði af stað og fór yfir götuna á Miðási á Egilsstöðum í miklu hvassviðri um miðjan febrúar.