Biðst afsökunar á óskýrum ummælum á borgarafundi
Jón Björn Hákonarson, formaður bæjarráðs Fjarðabyggðar, hefur beðist afsökunar á misskilningi sem ummæli hans á borgarafundi á Fáskrúðsfirði kunna að hafa valdið. Þar gagnrýndi frágang verktaka á stíg ofan við bæinn.
Umhverfismál voru íbúum á Fáskrúðsfirði efst í huga á fundinum og gagnrýndu meðal annars stíginn sem þykir grófur yfirferðar.
Á fundinum sagði Jón Björn að ekki hefði verið skilið við göngustíginn eins og gera átti og baðst afsökunar á því.
Tandraberg annaðist stíginn sem liggur frá Óseyri að gatnamótum Skólavegs við Hafnargötu. Í útboðsgögnum er gert ráð fyrir að keyrt verði óunnið efni í stíginn og var það tekið úr Dalsá með samþykki Fjarðabyggðar.
Mannvit hafði eftirlit með verkinu en Fjarðabyggð og RARIK voru verkkaupar. Í gögnum sem Austurfrétt hefur undir höndum er efnisvinnsla í stíginn samþykkt af hálfu Fjarðabyggðar og RARIK.
Austurfrétt hefur einnig undir höndum staðfestingu á niðurfellingu verktryggingar en hún er felld niður að ákveðnum tíma liðnum þegar lokaúttekt hefur farið fram þar sem staðfest er að verkið sé unnið samkvæmt verklýsingu og staðist kröfur í henni.
Tandraberg annaðist verkið og á síðasta fundi bæjarráðs var tekið fyrir erindi framkvæmdastjóra fyrirtækisins. Í bókun segir segir að formaður bæjarráðs hafi ekki ætlað að beina ummælum sínum á íbúafundinum að verktökum eða fyrirtækjum sem ávirðing. Þau hafi átt að snúast um að sveitarfélagið þyrfti að vanda sig sem verkkaupi hverju sinni í skilgreiningu á verkum sínum.
Hann biðjist því velvirðingar á því hafi þetta misskilist og ummæli hans sýnilega ekki verið sett fram með skýrum hætti.
