Blak: Tvö töp gegn KA
Karlalið Þróttar í blaki er áfram í fjórða sæti deildarinnar eftir tvo ósigra gegn toppliði KA í síðustu viku.Liðin mættust fyrst á Akureyri á þriðjudagskvöld og þann leik vann KA 3-0. KA liðið hafði yfirburði í fyrstu hrinu og vann hana 25-17.
Jafnt var löngum í annarri hrinu en eftir að staðan var 18-17 náði KA góðri rispu og vann 25-20. Yfirburðir Akureyrarliðsins í þriðju hrinunni voru algerir og vann það 25-11.
Lið Þróttar var reyndar vængbrotið í leiknum þar sem það vantaði báða Spánverjana, Borja Gonzales og Miguel Castrillo. Þeir komu hins vegar báðir inn fyrir seinni leikinn á laugardag en komu ekki í veg fyrir annan 0-3 sigur KA.
KA hafði undirtökin alla fyrstu hrinu en munurinn varð ekki meiri en þrjú stig fyrr en rétt í lokin. KA vann hana 18-25. KA hafði hins vegar meiri yfirburði í annarri hrinu og vann hana 15-25.
Þróttur átti hins vegar fína þriðju hrinu, átta sinnum skiptust liðin á forustu og var Þróttur yfir 23-22. KA vann hins vegar eftir upphækkun, 25-27. Castrillo var lykilmaður Þróttar og skoraði 23 stig í leiknum.
Þróttur er í fjórða sæti deildarinnar með átta stig eftir 10 leiki, tveimur stigum meira en Afturelding en fjórða sætið veitir rétt til þátttöku í úrslitakeppninni.
