Bleikju og urriða fækkar í Lagarfljóti eftir virkjun
Bleikjuveiði hefur minnkað í Lagarfljóti eftir að Kárahnjúkavirkjun kom
til skjalanna. Vísbendingar eru um að auknu gruggi í fljótinu sé um að
kenna. Annars staðar hafa myndast nýjar veiðilendur með í kjölfar
vatnaflutninga.
Þetta er meðal niðurstaðna rannsóknar Veiðimálastofnunar á fiskum á vatnasviði Lagarfljóts, Jökulsá á Dal, Gilsár og Fögruhlíðaráar.
Minna veiddist af bleikju við Egilsstaði og Hallormstað í fyrra sumar en í samanburðarrannsóknum árin 1998, 2005 og 2006. Þá veiddust tvöfalt fleiri bleikjur við Egilsstaði en Hallormsstað en þær voru jafn margar í fyrra. Færri urriðar veiddust einnig og var fækkunin hlutfallslega meiri við Egilsstaði.
Skýrsluhöfundar telja líklegt að minni veiði tengist meðal annars breytingum í gruggi og þar með frumframleiðni og fæðuframboði fyrir fisk í Lagarfljóti.
Í rannsóknunum 2005 og 2006 var nokkuð af vorflugulirfum/lirfuhúsum og vatnabobbum í maga beggja fisktegundanna. Ekkert varð vart við þessar fæðutegundir í rannsókninni 2010. Skýrsluhöfundar segja frekari rannsóknir þurfa til svo hægt sé að meta hvort þetta endurspegli raunverulega breytingu í fæðuframboði.
Grugg í Lagarfljóti jókst verulega þegar Jökulsá á Dal var veitt í Fljótið með Kárahnjúkavirkjun. Við það minnkar gagnsæi vatnsins. Rennsli í fljótinu hefur einnig aukist. Rýni er notuð til að mæla hversu langt ljós nær niður í vatn.
Við Egilsstaði mældist rýni í eldri rannsóknum 24-60 sentímetrar en 15 sm í ágúst 2010. Við Hallormsstað minnkaði rýnið úr 19-26 sm í 18 sm. Í skýrslunni er samt bent á að grugg í Lagarfljóti geti verið nokkuð breytilegt milli ára.
Á vatnasviði Jökulsár á Dal hefur veiðinýting aukist samhliða minnkun jökulvatns í ánni. Laxaseiðum hefur undanfarin ár verið sleppt í hliðarár árinnar. Seiðum hefur einnig verið sleppt í Eyvindará á vatnasviði Lagarfljóts.
