Djúpavogshreppur hlýtur viðurkenningu fyrir brautryðjendastarf í þágu minjaverndar
Minjastofnun Íslands hefur veitt Djúpavogshreppi sérstaka viðurkenningu fyrir mikilvægt brautryðjendastarf í þágu minjaverndar. Viðurkenningin er veitt fyrir sérstaka áherslu á verndun menningararfs í stefnumörkun sveitarfélagsins á sviði skipulagsmála og atvinnuþróunar.Viðurkenningin var veitt á ársfundi stofnunarinnar á fimmtudag en þetta er í annað sinn sem viðurkenningin er afhent. Vegagerðin hlaut hana árið 2015.
Djúpivogur varð nýverið fyrst sveitarfélaga til að fá staðfest verndarsvæði í byggð. Fleira liggur hins vegar að baki viðurkenningunni.
Í rökstuðningi Minjastofnunar segir að þótt byggðarlagið hafi átt í vök að verjast í atvinnumálum hafi sveitastjórnendur engu að síður lagt metnað sinn í að marka byggðarlaginu sérstöðu í skipulags- og atvinnumálum með að leggja áherslu á sögulega arfleifð staðarins í allri stefnumótun en hann er meðal elstu verslunarstaða landsins.
Í aðalskipulagi hreppsins fyrir árin 2008-2020 hafi verið sett fram metnaðarfull húsaverndarstefna og á grundvelli hennar hafi verið unnin viðamikil húsakönnun sem lokið var við 2014. Sú hafi verið vandarði og efnismeiri en flestar slíkar kannanir sem gerðar hafi verið hér á landi.
Auk stefnumótunar hefur sveitarfélagið beitt sér fyrir og að hluta til kostað endurbyggingu þriggja gamalla húsa og er eitt þeirra, Geysir, nú ráðhús byggðarlagsins. Frumkvæði forráðamanna sveitarfélagsins á sviði húsverndar hefur orðið eigendum eldri húsa á staðnum hvatning til að gera upp hús sín og á þann hátt styrkja hina sögulegu ásýnd byggðarinnar.
Andrés Skúlason, oddviti Djúpavogshrepps, tekur við viðurkenningunni úr höndum Kristínar Huldar Sigurðardóttur, forstöðumanns Minjastofnunar.