Vestmannaey dregin til hafnar í Neskaupstað vegna elds
Eldur kom upp um borð í vélarrými Vestmannaeyjar síðdegis í dag þegar skipið var á leið til löndunar í Neskaupstað með fullfermi. Engin slys urðu á áhafnarmeðlimum og er skipið nú dregið til hafnar af systurskipinu Bergey.
Óljóst er hvers vegna eldurinn kviknaði í ísfisktogaranum síðdegis í dag en skipverjar reyndu strax að slökkva eldinn um leið og hans varð vart án árangurs. Var drepið á öllum vélum og rýmum lokað hið snarasta. Óskaði skipið aðstoðar en næst Vestamannaey á þeim tíma var systurskipið Bergey sem tók skipið í tog þegar til þess náðist.
Gert er ráð fyrir að Bergey komi til hafnar í Neskaupstað með Vestmannaey í eftirdragi um tvöleytið í nótt en til taks á staðnum er dráttarbáturinn Vöttur. Ennfremur er slökkvilið og aðrir viðbragðsaðilar í Neskaupsstað við öllu búnir þegar skipin ná landi.
Mynd Guðmundur Alfreðsson/Síldarvinnslan
