Einstaklega vel heppnaður Stelpugolfdagur Golfklúbbs Fljótsdalshéraðs
Rétt tæplega 40 konur á öllum aldri nýttu tækifærið á sunnudaginn var þegar Golfklúbbur Fljótsdalshéraðs í samvinnu við Golfsamband Íslands og PGA á Íslandi bauð upp á sérstakan stelpugolfdag á golfvellinum að Ekkjufelli. Þátttakan fór langt fram úr björtustu vonum þrátt fyrir að veðrið hafi ekki verið sem best.
Stelpugolfdagurinn er átak sem GSÍ og PGA Ísland standa fyrir í samvinnu við golfklúbba í landinu og er ætlað að freista þess að heilla fleiri stelpur og konur í íþróttina en töluvert hallar á kvenkynið almennt í golfinu á Íslandi.
Formaður Golfklúbbs Fljótsdalshéraðs, Friðrik Bjartur Magnússon, segir stöðuna verri austanlands en annars staðar samkvæmt sinni eigin úttekt.
„Ég kíkti á tölfræðina í golfinu almennt fyrir nokkru og mér sýnist almennt að um þriðjungur meðlima í klúbbunum víðast hvar séu kvenkyns. En hér á Austurlandi, hugsanlega með golfklúbbinn í Neskaupstað sem undantekningu, er hlutfallið mun lægra eða undir 20 prósentum. Í því ljósi var ekkert minna en frábært hversu margar konur mættu og fengu kynningu og kennslu, tóku þátt í þrautum auk þess sem boðið var upp á veitingar og gjafir. Það veit sannarlega á gott hve þátttakan var góð og vonandi verður það til að fjölga konunum í golfinu hér og annars staðar.“
Frí kynning og kennsla og fríar veitingar í kjölfarið á Stelpugolfdegi Golfklúbbs Fljótsdalshéraðs á sunnudaginn. Þátttakendur lýstu mikilli ánægju með daginn. Mynd GFH
