Elísabet Jökuls skilaði inn meðmælendalistunum
Elísabet Jökulsdóttir skilaði inn meðmælendalistum til forsetaframboðs úr Austfirðingafjórðungi hjá sýslumanni í gær. Þar með ætti forsetaframboð hennar að teljast gilt.
Yfirkjörstjórnir hafa undanfarna viku kallað inn og farið yfir meðmælendalista forsetaefna. Yfirkjörstjórn Norðausturkjördæmis kom saman á þriðjudag og þá hafði Elísabet ekki safnað nógu mörgum undirskriftum á svæðinu.
Elísabet kom austur í fyrrakvöld eftir að hafa verið á Akureyri til að safna undirskriftum. Hún náði tilskildum fjölda ríflega sextíu talsins og skilaði inn hjá sýslumanni á þriðja tímanum í gær.
Meðmælendalistinn að austan var forsenda þess að Elísabet gæti boðið sig fram til forseta. Á Facebook-síðu hennar er staðfest að hún hafi náð tilskyldum fjölda í öllum kjördæmum.
Frambjóðendur hafa frest til miðnættis í kvöld til að skila inn gögnum til framboðs. Í þeim felst samþykki forsetaefnis, nægilegur fjöldi meðmælenda og vottorð viðkomandi yfirkjörstjórna um að meðmælendur séu kosningarbærir.