Ellefu mánaða gamalt barn smitað af mislingum
Embætti landlæknis hefur staðfest að ellefu mánaða gamalt barn hafi smitast af mislinum. Talið er að barnið hafi smitast af því að vera í sama flugi og einstaklingur með mislinga.Flugið var með Air Iceland Connect frá Reykjavík til Egilsstaða þann 15. febrúar síðastliðinn en maðurinn hafði daginn áður komið til landsins frá Filippseyjum í gegnum London með flugi Icelandair. Farþegum í flugunum tveimur hefur verið gert viðvart um smithættu.
Barnið var lagt inn á Barnaspítala Hringsins á föstudag og heilsast vel eftir atvikum, að því er fram kemur í tilkynningu. Líkur á frekara smiti frá barninu er ólíklegt en einstaklingar í nánasta umhverfi barnsins eru bólusettir gegn mislingum.
Á þessari stundu er ekki vitað um fleiri smitaða einstaklinga en mögulega má búast við smiti fram til 7. mars en þá eru 3 vikur liðnar frá því að einstaklingurinn með smitið var á ferðalagi.
Í tilkynningu embættisins er minnt á að mislingar séu með mest smitandi sjúkdómum sem þekkjast. Engin meðferð er til við sjúkdómnum og eina fyrirbyggjandi meðferðin felst í bólusetningu sem veitir meira en 95% vörn.
Bólusetning gegn mislingum er við 18 mánaða og 12 ára aldur. Hægt er að bólusetja börn frá 6 mánaða aldri en vörn bólusetningarinnar er óviss á aldrinum 6−12 mánaða. Litlar líkur eru á vernd ef bólusett er fyrir 6 mánaða aldur.
