Engar Íslandstökur í lokaseríu Fortitude
Engar Íslandstökur verða í þriðju og síðustu þáttaröðinni af bresku spennuþáttunum Fortitude sem teknir verða upp á næstunni. Útitökur fyrir fyrstu þáttaraðirnar tvær ásamt fleiri atriðum voru teknar upp á Austfjörðum.Þetta staðfesti talsmaður Sky sjónvarpsstöðvarinnar, sem kaupir þættina og frumsýnir þá, eftir fyrirspurn Austurfréttar. Í staðinn verður tekið upp á Svalbarða þar sem þættirnir gerast í raun.
Sjónvarpsstöðin tilkynnti í síðustu viku að þriðja þáttaröðin yrði tekin upp innan skamms og hún verði jafnframt sú síðasta.
Fyrsta þáttaröðin naut mikilla vinsælda og horfði yfir milljón Breta á hvern þátt. Áhorfið hrundi hins vegar á meðan önnur þáttaröðin var í loftinu, niður í 0,1 milljón á lokaþáttinn.
Forsvarsmenn Sky bera þó höfuðið hátt og segja að 1,4 milljón manna hafi horft á hvern þátt annarrar þáttaraðar, auk þess sem þættirnir voru seldir til yfir 200 sjónvarpsstöðva á heimsvísu. Engin þáttaröð Sky hefur verið seld jafn víða.
Aðeins fjórir þættir verða í nýju þáttaröðinni, í stað tólf og tíu áður. Björn Hlynur Haraldsson verður áfram með hlutverk í þáttunum líkt og önnur kunnugleg andlits svo sem Dennis Quaid, Richard Dormer, Luke Treadaway og Mia Jexen.
