Félagasamtök vilja kaupa barnaskólann á Eiðum
Bæjarráð Fljótsdalshéraðs hefur falið bæjarstjóra að ræða við tvö félagasamtök í Eiðaþinghá sem vilja kaupa gamla barna- og leikskólann á Eiðum.
Þetta var samþykkt á fundi bæjarráðs í gær þar sem tekið var fyrir 23ja milljóna boð Búnaðarfélags Eiðaþinghár og Kvenfélags Eiðaþinghár í húsnæðið.
Í tilboðinu er einnig óskað eftir afnotum af íþróttavellinum á Eiðum gegn því að hirða hann. Völlurinn var um árabil í umsjón UÍA en í eigu sveitarfélagsins.
Félögin ætla sér að reka ferðaþjónustu í hluta húsanna og nýta það sem félagsaðstöðu fyrir nærsamfélagið. Í afgreiðslu bæjarráðs felst þó engin endanleg afstaða til tilboðsins.