Fjarðabyggð: Ekki stórkostleg skerðing á þjónustu þótt engin loðna veiðist
Bæjarstjóri Fjarðabyggðar segir að ekki verði stórkostlegur niðurskurður á þjónustu sveitarfélagsins þótt tekjur sveitarfélagsins dragist saman ef engin loðna veiðist á næsta ári.
„Minni tekjur þýða einfaldlega að þá þarf að aðlaga útgjöldin að þeim tekjuramma, en við munum ekki taka neinar dýfur í skerðingu á þjónustu sveitarfélagsins.
Þó tekjur dragist núna saman, munu þær koma upp á ný, en varfærin tekjuspá er þó lykilatriði þar sem útgjaldaramminn er miðaður við þær tekjur sem sveitarfélagið aflar,“ segir Páll Björgvin Guðmundsson, bæjarstjóri.
Að loknum rannsóknum í haust ráðlagði Hafrannsóknastofnun að engin loðna verði veidd á næsta ári. Fjarðabyggð er stærsta löndunarhöfn uppsjávarfiski og sveiflur í veiðum, sölu eða sterkara gengi krónunnar, eins og verið hefur, hafa neikvæð áhrif á útsvarstekjur sveitarfélagsins.
Í fjárhagsáætlun sveitarfélagsins fyrir árið 2017, sem tekin var til fyrri umræðu í bæjarstjórn í síðustu viku, er gert ráð fyrir að útsvarstekjur þess hækki aðeins um 5% milli ára. Þegar hefur verið færð inn varúðarfærsla vegna lélegrar loðnuvertíðar í ár.
Páll bendir á að áhrifin séu bundin við útsvarið heldur hafnargjöld og óbeinar tekjur, svo sem frá fyrirtækum sem þjónusta sjávarútveginn.
Þar sem blikur eru á lofti verður lengri tíma tekin í umræðu um fjárhagsáætlunina en vanalega. „Við klárum aðra umræðu um hana 1.desember sem er nokkuð seinna en vanalega vegna þessara óvissu.“