Fjórar sóttu um stöðu skólastjóra Seyðisfjarðarskóla
Fjórar umsóknir bárust um stöðu skólastjóra Seyðisfjarðarskóla sem auglýst var í apríl. Nýjum skólastjóra er ætlað að sameina grunn-, leik- og tónlistarskóla í einn.
Umsækjendur eru: Jóhanna Thorsteinsson leikskólastjóri Seyðisfirði, Lind Völundardóttir verkefnastjóri Reykjavík, Svandís Egilsdóttir skólastjóri Borgarfirði og Þórunn Hrund Óladóttir aðstoðarskólastjóri.
Þórunn Hrund situr einnig í bæjarráði fyrir Seyðisfjarðarlistann. Hún vék sæti við afgreiðslu málsins í bæjarráði. Ráðið sér samkvæmt erindisbréfi um ráðningar í helstu stjórnunarstöður bæjarins í í bókun þess segir að „vegna stöðu hluta umsækjenda í og gagnvart stjórnsýslu kaupstaðarins“ sé lagt til að bæjarstjórn ráði í starfið.
Ráðið samþykkti hins vegar að leita til sérfræðings í starfsmanna- og ráðningarmálum til að leggja mat á hæfi umsækjenda. „Mikilvægt er að góð samstaða og traust ríki um ráðninguna,“ segir í bókuninni.
Bæjarstjórn tók afgreiðslu bæjarráðs fyrir á síðasta fundi og samþykkti að taka verkið að sér. Samkvæmt fundargerð vék Þórunn Hrund ekki þar sæti heldur sat hjá við afgreiðslu tillögunnar.