Fljótsdalshérað auglýsir eftir bæjarstjóra
Sveitarfélagið Fljótsdalshérað auglýsir í Morgunblaðinu í dag, stöðu Bæjarstjóra Fljótsdalshéraðs lausa til umsóknar. Umsóknarfrestur um stöðuna er til 24. júní næstkomandi.
Sveitarfélagið leitar eftir dugmiklum einstaklingi til að takast á við krefjandi verkefni. Helstu verkefni verðandi bæjarstjóra verða samkvæmt auglýsingunni, yfirumsjón með rekstri sveitarfélagsins, yfirumsjón með skipulagi og virkni stjórnsýslu sveitarfélagsins, stefnumótun og áætlanagerð, náið samstarf við bæjarstjórn undirbúningur og upplýsingagjöf á fundum bæjarstjórnar og bæjarráðs, ábyrgð á framkvæmd ákvarðana bæjarstjórnar og samskipti við stofnanir, samtök, fyrirtæki og íbúa.
Hæfniskröfur sem tíundaðar eru í auglýsingunni eru, hæfni í mannlegum samskiptum, reynsla af stjórnun og rekstri, háskólamenntun sem nýtist í starfi er kostur en ekki skylirði, þekking og reynsla á sviði opinberrar stjórnsýslu er kostur og reynsla af störfum á sveitarstjórnarstigi er æskileg.
