Fljótsdalshérað: Minnihlutinn vill sameina tónlistarskólana og unglingadeildir grunnskóla
Minnihluti fræðslunefndar Fljótsdalshéraðs vill að skoðaðir verði
möguleikar á að sameina tónlistarskólana í sveitarfélaginu og
unglingadeildir Fellaskóla og Egilsstaðaskóla. Meirihlutinn vill skoða
aðrar hagræðingarleiðir. Nefndin er þó einhuga um að hafin verið vinna
við sameiningu leikskólanna Tjarnarlands og Skógarlands.
Á seinasta fundi nefndarinnar lagði minnihlutinn fram bókun þar sem lagt er til að nefndin skoði galla og kosti þess að sameina tónlistarkennslu í sveitarfélaginu. Þar eru í dag reknir þrír sjálfstæðir tónlistarskólar, í Fellum, Brúarási og á Egilsstöðum.
Minnihlutinn telur að með sameiningunni fáist ekki aðeins fjárhagslegur sparnaður heldur sé hægt að auka gæði og framboð kennslunnar. Með því megi ráða kennara í fullt starf sem geti einbeitt sér að tónlistarkennslunni.
Minnihlutinn lagði einnig til að kannaðir yrðu lagt yrði bæði faglegt og fjárhagslegt mat á áhrif þess að sameina unglingadeildir Fellaskóla og Egilsstaðaskóla frá og með næsta skólaári. Gegn þeirri hugmynd lagðist meirihlutinn þar sem hugmyndin um að flytja unglingastig Fellaskóla í Egilsstaðaskóla hefði í för með sér mikla breytingu á skólagöngu nemenda á viðkvæmu aldursstigi, fyrir utan að hafa neikvæð áhrif á skólastarf í skólahverfi Fellaskóla.
Meirihlutinn vill á móti skoða sameiningu skólanna í skólahverfi Fellaskóla en þar eru reknir leikskóli, tónlistarskóli og grunnskóli. Sú tillaga útilok á að sama tíma sé könnuð sameining tónlistarskóla sveitarfélagsins.
Nefndin var hins vegar einhuga um að hefja vinnu við sameiningu leikskólanna Tjarnarlands og Skógalands á Egilsstöðum frá og með næsta skólaári. Nefndin telur að sameining skólanna hafi ekki neikvæð áhrif á faglegt starf þeirra eða þjónustu.
Þá leggur nefndin til að Tónlistarskóli Austur-Héraðs verði alfarið fluttur úr núverandi húsnæði í Selási 19 í Egilsstaðaskóla næsta sumar þar sem stór hluti kennslunnar fer þegar fram.
Tillögurnar voru allar hluti af vinnu nefndarinnar fyrir fjárhagsáætlun næsta árs. Þá er útlit fyrir að bæði leikskóla – og tónlistarskólagjöld hækki um 8,6% frá og með 1. janúar 2012.
