Fyrsta Lundúnaflugið: Eftir alla þessa vinnu er þetta orðið að veruleika – Myndir
Umdæmisstjóri ISAVIA á Austurlandi segir fyrsta beina flugið milli Egilsstaða og Lundúna árangur mikillar vinnu síðustu misseri. Hjá bresku ferðaskrifstofunni Discover the World binda menn vonir um að sumarið verði það gott að forsendur verði til að halda fluginu áfram.
Þota AirBaltic kom til Egilsstaða um klukkan kortér í tólf í dag frá Keflavík. Með henni kom fjöldi farþega frá Keflavík, þeirra á meðal skólahópur sem ferðast mun um hálendið norðaustur af Vatnajökli næstu daga áður en hann flýgur utan með næstu ferð á miðvikudag.
Um klukkan eitt fór vélin í loftið og kom heim aftur um klukkan níu í kvöld. Út fór 33 farþegar en um sextíu komu með henni frá Englandi.
Flugið er farið á vegum Discover the World. John Farrugia, sem stýrir flugrekstri félagsins, vonast til að flugin sem verða níu talsins í sumar gangi vel.
„Við hlökkum til góðs sumars með AirBaltic og flugvallaryfirvöldum á Egilsstöðum. Við vonumst eftir flugið fari vaxandi og leitum eftir samstarfi við sem flesta til að svo megi verða.
Við erum spenntir og stoltir í dag og vongóðir um að framhald verði á þessu verkefni.“
Upphaflega voru áætlaðar 36 ferðir í sumar frá lokum maí fram í september. Þegar salan stóð ekki undir væntingum var ferðunum fækkað verulega. „Salan gæti verið betri en við reynum allt sem við getum, bæði Lundúnamegin og hér,“ sagði John í samtali við Austurfrétt í dag.
Jörundur Ragnarsson umdæmisstjóri ISAVIA á Austurlandi sagði komu vélarinnar stóran áfanga fyrir umferð um Egilsstaðaflugvöll.
„Við erum óheyrilega stolt í dag. Eftir allan þennan tíma og alla þessa vinnu er þetta orðið að veruleika. Það hefur tekist að koma á fyrsta áætlunarfluginu til Lundúna.
Við erum ánægð með flugið og þótt ferðirnar séu ekki óskaplega margar þá mun þeim fjölga. Kannski var þetta var þetta akkúrat það sem við biðum eftir til að geta byrjað og getum vonandi byggt ofan á.“