Glöð og ánægð yfir að vera komin til nýrra heimkynna
Sjö manna fjölskylda á flótta kom til Reyðarfjarðar á miðvikudaginn var. Þar með eru komnir þeir 19 flóttamenn sem væntanlegir voru til sveitarfélagsins í byrjun árs. Framundan er að kynnast nýjum heimkynnum.„Það er aðdáunarvert hversu vel samfélagið hefur sameinast um að taka á móti fólkinu,“ segir Rakel Kemp, verkefnastjóri hjá Fjarðabyggð.
Fjölskyldurnar eru fjórar, tvær dvelja á Reyðarfirði og tvær í Neskaupstað. Allt fólkið er íraskt en hefur dvalið í flóttamannabúðum í Jórdaníu að undanförnu.
Sú síðasta kom viku seinna en hinar og var ferðalag hennar heldur lengra en hinna. „Það fólk kom í gegnum Istanbúl og Helsinki þar það lenti í seinkun á flugi. Þau eru glöð og ánægð með að vera komin til okkar þrátt fyrir að vera þreytt,“ segir Rakel.
Sú lenti eystra í hundslappadrífu. „Það er ekki hægt að lýsa lukkunni sem hún vakti, þetta var ekki bara snjókoma heldur jólasnjókoma. Þau settu hendurnar upp í loftið til að taka á móti snjónum.
Þrátt fyrir að hafa aldrei séð snjó áður vissu þau alveg hvað þau áttu að gera við hann og fóru í snjókast. Það var sérstaklega gaman að sjá gleðina í börnunum þótt þeim fullorðnu hafi líka verið mikið um.“
Fjölskyldurnar hafa nú farið í gegnum heilsufarsskoðun og verið skráðar inn í landið. Börnin hafa síðan hafið íþróttaæfingar. Rakel segir einnig að fólkið sé mikið sundfólk og áhugasamt um laugarnar í Fjarðabyggð.
Á morgun hefst síðan kennsla í íslensku og samfélagsfræðum sem standa mun í um tvær vikur. „Þau eru að koma sér fyrir og ná áttum, átta sig á gjaldmiðlinum og fara út í búð. Tilfinning mín er að þetta sé geðþekkt fólk og hugur í þeim að komast af stað í samfélaginu.“
Fjarðabyggð nýtur liðsinnis sjálfboðaliða frá Rauða krossinum en Rakel segir samfélagið allt taka vel á móti nýju íbúunum. „Það er sama hvar stigið er niður færi, í skólum, búðunum eða meðal sjálfboðaliða, allir eru tilbúnir að hlaupa undir bagga.“
Frá komu flóttafólks í lok febrúar. Mynd: Rauði kross Íslands
