Hafa tvöfaldað afkastagetu frystihússins
Frystihús Loðnuvinnslunnar á Fáskrúðsfirði afkastar nú tvöfalt meiri afla heldur en það gerði fyrir fjórum árum síðar. Mikið hefur verið lagt í tæknivæðingu hússins á síðustu árum.„Við byrjuðum að tæknivæðast fyrir þremur árum. Við settum fyrst upp nýja skurðarvél, síðan lausfrysti og loks nýja flæðilínu í haust.
Við fórum með 200 tonn af fiski í gegnum húsið á átta tímum síðustu vikuna í maí. Það eru tvöföld afköst á við það sem var áður en við byrjuðum tæknivæðinguna, með sama fjölda af fólki,“ segir Friðrik Mar Guðmundsson, framkvæmdastjóri Loðnuvinnslunnar.
Kolmunnavertíð er að ljúka á Fáskrúðsfirði eins og hjá flestum öðrum austfirskum sjávarútvegsfyrirtækjum, en Friðrik Mar segir veiðarnar hafa farið að tregast fyrr en síðustu ár.
Friðrik Mar segir veiðarnar hafa gengið erfiðlega sem sést á því að alls hafa verið veidd rúm 178 þúsund tonn af kolmunna það sem af er ári, samanborið við tæp 225 þúsund tonn fyrri helming ársins í fyrra.
„Veturinn var erfiður því veðrið á Norður-Atlantshafi hefur verið óvenju slæmt. Það var brjálað þegar við vorum að veiða við Færeyjar í janúar og mjög leiðinlegt þegar við færðum okkur í áttina til Írlands. Við bætist að minna gekk af kolmunna inn í færeysku lögsöguna.
Við getum veitt aftur í haust. Við hjá Loðnuvinnslunni munum klára okkar kvóta en ég held að kvóti íslenskra skipa náist ekki.“
