Hnífjafnt í síðustu könnun fyrir kosningar úr Norðausturkjördæmi
Samfylkingin er áfram stærst í Norðausturkjördæmi. Sjálfstæðisflokkurinn er í sókn meðan Miðflokkurinn tapar fylgi.Þetta kemur fram í nýjasta þjóðarpúlsi Gallup, sem Austurfrétt hefur aðgengi að í gegnum samkomulag við RÚV. Fylgistölur hans eru líkari þeim sem birtust í könnun Maskínu í gær en kannanir sem komu fyrir viku virðast hafa verið útlagar. Að baki tölunum eru 250 atkvæði.
Samfylkingin er stærst en á eftir henni kemur Sjálfstæðisflokkur og síðan Framsókn. Þau tíðindi eru að fylgi Miðflokksins minnkar töluvert og mælist Flokkur fólksins nú stærri.
Þetta þýðir að Samfylking, Framsóknarflokkur og Sjálfstæðisflokkur fá tvo þingmenn hver, Flokkur fólksins, Viðreisn og Miðflokkur einn. Þetta eru þeir níu kjördæmakjörnu þingmenn sem eru í kjördæminu.
Tíundi þingmaðurinn er jöfnunarþingmaður og því ráða úrslit á landsvísu hvar hann hafnar. Samkvæmt útreikningum Austurfréttar eru annar þingmaður Viðreisnar og fyrsti þingmaður Sósíalistaflokksins næstir inn kjördæmakjörnir. Þeir eru jafnir og nokkuð lengra í næstu þingmenn annarra framboða.
Í þessum sætum sitja Austfirðingar, Heiða Ingimarsdóttir hjá Viðreisn og Þorsteinn Bergsson hjá Sósíalistaflokknum.
