Hoffellið verður á Eskifirði út vikuna
Viðgerð á Hoffelli, flutningaskipi Samskipa sem kom til Eskifjarðar á sunnudagskvöld með bilaða vél, tekur lengri tíma en áætlað var. Ljóst er að skipið lætur ekki úr höfn í þessari viku.Samkvæmt tilkynningu frá Samskipum kom í ljós við nánari skoðun að kalla þyrfti eftir varahlutum, sem almennt eru ekki um borð, erlendis frá. Fyrst í stað leit út fyrir að hægt yrði að gera við bilunina, sem varð í ventli, með varahlutum sem til voru um borð.
Skipið varð vélarvana á sunnudag í mynni Reyðarfjarðar, rétt rúmum klukkutíma eftir að það lét þaðan úr höfn. Eftir þriggja tíma stopp tókst að koma vélinni aftur í gang og sigldi skipið fyrir takmörkuðu afli til Eskifjarðar.
Töfin kemur til með að raska tímabundið siglingaáætlun Samskipa en Hoffellið var á leið til Rotterdam. Töluvert af varningi var um borð.
Unnið er að því að koma sendingum sem um borð í skipinu eru til viðtakenda eftir öðrum leiðum. Megnið fer með Skaftafelli, öðru skipi Samskipa, sem væntanlegt er til Reyðarfjarðar á laugardag.
Þá gera Samskip ráðstafanir til þess að bilunin í vél Hoffellsins hafi sem minnst áhrif á vörusendingar á leið til landsins.
Hoffell heldur úr höfn jafnskjótt og viðgerð lýkur.