Icelandair flýtir kvöldflugi til Egilsstaða
Icelandair hefur ákveðið að flýta kvöldflugi sínu til Egilsstaða vegna veðurviðvarana í dag. Öllu öðru innanlandsflugi hefur verið aflýst.Flugi til Egilsstaða var aflýst í morgun vegna veðurs. Aftur hvessir undir kvöldmat og þess vegna var ákveðið að flýta kvöldfluginu. Það fer úr Reykjavík klukkan 16:00 í stað 17:55 áður. Að sama skapi fer vélin í loftið til baka klukkan 17:30.
Á vef Icelandair má lesa að reiknað er með að flugið austur taki 38 mínútur, sem er í allra hraðasta lagi. Hvass suðvestanvindur við landið veitir henni meðbyr austur en viðbúið er að hann tefji flugið suður, líkt og reyndin hefur verið með millilandaflug í dag. Það er enda áætlað 65 mínútur.
Samkvæmt upplýsingum frá Icelandair næst með þessari vél að bjóða öllum sem áttu bókað far í morgun og vildu enn fljúga austur sæti. Samkvæmt áætlun er ein vél til Egilsstaða í fyrramálið og er útlit fyrir flug þá gott.
Á morgun hefur verið bætt við flugvél til Akureyrar en fjórum vélum þangað var aflýst í dag. Þá var tveimur vélum til Ísafjarðar aflýst. Enn er til skoðunar hvaða möguleikar og þörf séu til að hjálpa farþegum á áfangastað.
