Landsbyggðalatté í boði á N4
Nýr umræðuþáttur, Landsbyggðalatté, hefur göngu sína á sjónvarpsstöðinni N4 á morgun. Þátturinn verður helgaður byggðamálum.Í þættinum verða landsmálin rædd af áhugafólki um samfélags- og byggðarmál á forsendum ólíkra landsbyggða, velt upp mikilvægum viðfangsefnum sem sjaldnast eru talin til byggðamála og leitað að nýjum og áhugaverðum hliðum á gömlum og lúnum þrætueplum byggðaumræðunnar. Áhersla verður lögð á opna og uppbyggilega umræðu um mikilvæg málefni.
Í tilkynningu segir að nafnið á þættinum sé til að undirstrika að hann brýtur svolítið upp klisjurnar sem einkenna oft umræðuna um byggðamál
Þáttastjórnendur eru Þóroddur Bjarnason prófessor við Háskólann á Akureyri, Eva Pandora Baldursdóttir sérfræðingur hjá Byggðastofnun og fyrrverandi þingmaður, Jón Þorvaldur Heiðarsson lektor við Háskólann á Akureyri og Brynhildur Pétursdóttir framkvæmdastjóri Neytendasamtakanna og fyrrverandi þingmaður. Þau fá síðan til sín áhugafólk um hin ýmsu málefni landsbyggðanna.