Laxarennan við Steinbogann tilbúin
Fréttir • This email address is being protected from spambots. You need JavaScript enabled to view it. • Fyrst birt 14. ágú 2012 18:14 • Uppfært 08. jan 2016 19:23
Laxarennan við svonefndan Steinboga í Jökulsá á Dal er tilbúin og var opnuð fyrir verslunarmannahelgi. Laxar eru farnir að veiðast fyrir ofan bogann.
Fram kemur á vef veiðiþjónustunnar Strengja að veiði hafi gengið vel fyrstu dagana eftir opnun fiskrennunnar. Suma dagana hefur allt að helmingur laxanna veiðst ofan bogans.
Fiskvegurinn var gerður eftir framkvæmdaleyfi sem sveitarfélagið Fljótsdalshérað gaf út í fyrrahaust. Snemmsumars var sótt um breytingar á því þar sem fiskvegurinn yrði breikkaður en því var hafnað.
Framkvæmdin var umdeild og fóru landeigendur meðal annars fram á að útgefið framkvæmdaleyfið yrði afturkallað og vinna við veginn stöðvuð. Sveitarfélagið féllst ekki á það. Þá vísaði sýslumannsembættið á Seyðisfirði lögbannskröfu á framkvæmdina frá.
Veiði er hins vegar lokið í Jökulsánni í ár þar sem Hálslón er orðið fullt og jökulvatn farið að renna um yfirfall niður í farveg Jöklu. Lónið í ár fylltist fimm vikum fyrr en í fyrra. Bæði hefur sumarið nú verið hlýrra en í fyrra auk þess sem langt haust þýddi að staðan var hærri fyrri veturinn.
