Loðnuleit lokið án jákvæðrar niðurstöðu
Ekki eru forsendur til að gefa út loðnukvóta eftir síðasta loðnuleitarleiðangurinn sem lauk um helgina. Framhaldið verður metið á morgun.„Þessari viðamiklu leit er lokið án jákvæðrar niðurstöðu,“ segir Þorsteinn Sigurðsson, sviðsstjóri uppsjávarlífríkis hjá Hafrannsóknastofnun.
Íslensku skipin sem tóku þátt í fjórðu umferð loðnuleitarinnar á þessu ári komu til hafnar í gærkvöldi. Þeirra á meðal var Polar Amaroq, skip grænlensks dótturfélags Síldarvinnslunnar.
Í samtali við Austurfrétt sagði Þorsteinn að niðurstöðurnar væru aðeins í samræmi við það sem áður hefði komið fram. Ekki er því hægt að gefa út loðnuveiðikvóta miðað við ástandið.
„Við höfum gert allt sem í mannlegu valdi er og miðað við þá þekkingu sem er til staðar til að skoða þetta,“ segir Þorsteinn.
Hann segir að möguleikar á frekari leit verði ræddir á samráðsfundi á morgun. Helst sé hægt að horfa eftir vesturgöngu loðnunnar. Slík leit yrði hins vegar án þátttöku rannsóknaskipa stofnunarinnar sem eru á leið í togararall.
Samkvæmt tölum frá Landsbanka Íslands hefur útflutningsverðmæti loðnu numið um 18 milljörðum króna síðustu þrjú ár, eða 0,6% af landsframleiðslu.
Í gögnum Hagstofunnar kemur fram að aflaverðmæti loðnu árið 2017 hafi verið 3,6 milljarðar af landsvísu, þar af 1,8 í fimm austfirskum höfnum.
Loðna hefur verið veidd samfleytt á Íslandi frá árinu 1963. Dæmi eru um litlar vertíðir, svo sem 2009, en ekki að loðnan hafi alveg horfið. Ljóst er að ef loðnuvertíðin bregst hefur það gríðarleg áhrif á afkomu Austfirðinga.
Japanskir loðnukaupendur hafa síðustu daga beðið milli vonar og ótta af tíðindum af leitinni í Neskaupstað. Á vef Síldarvinnslunnar er haft eftir einum þeirra að íslenska loðnan njóti mikilla vinsælda í Japan en hætta sé á að neytendur snúi sér annað hverfi hún alveg af markaðinum. Kaupendurnir hafa þó áhuga á að kaupa aðrar tegundir af Íslendingum, svo sem makríl.
