Hluta Nesskóla lokað vegna myglusvepps
Ákveðið hefur verið að loka jarðhæð í vesturálmu Nesskóla í Neskaupstað tímabundið vegna myglusvepps. Ráðist verður í endurbætur á húsnæðinu í annað sinn á tveimur árum.
Þetta kemur fram í tilkynningu sem birt var á vef Fjarðabyggðar að loknum fundi bæjarráðs í gær þar sem ákveðið varð aloka álmunni.
Myglugró komu fram í rannsóknir eftir kvartanir starfsfólks árið 2014. Í kjölfarið var ráðist í töluverðar framkvæmdir á suðurvegg álmunnar en nú er ljóst að þær aðgerðir dugðu ekki til.
Sjö sýni voru tekin í apríl og fannst mygla í þremur þeirra. Vesturálman er elsti byggingarhluti Nesskóla, byggð árið 1930 og hýsir jarðhæðin Tónskóla Neskaupstaðar ásamt myndmenntarstofu Nesskóla.
Jarðhæðin verður lokuð frá og með deginum í dag þar til endurbótum á húsnæðinu verður lokið.Fjarlægja verður mygluð og rakaskemmd byggingarefni og klæða álmuna að utan.
Kennsla fellur niður hjá tónskólanum síðustu tvær vikur skólaársins og myndmennt verður kennd annars staðar í Nesskóla af þessum sökum.
Í tilkynningunni segir að umfang aðgerða liggi að öðru leyti ekki enn fyrir og verður á næstu vikum farið vandlega yfir ástand húsnæðisins og frekari framkvæmdaþörf.
