Meiri flutningsgeta með nýjum jarðstrengjum
Nýverið lauk vinnu við styrkingu á jarðstrengjum í þremur austfirskum raflínum. Markmiðið var að auka orkuflutningsgetu þannig að strengirnir takmarki ekki lengur flutningsgetu loftlínanna sem þeir tengjast.„Nýju jarðstrengirnir koma í staðinn fyrir eldri strengi sem voru of afkastalitlir og sköpuðu því flöskuháls í kerfinu á nokkrum stöðum. Þessi framkvæmd við endurnýjun jarðstrengjanna skiptir miklu máli fyrir raforkuöryggi á svæðinu“ segir Nils Gústavsson, framkvæmdastjóri framkvæmda- og rekstrarsviðs Landsnets.
Strengirnir eru í Eskifjarðarlínu 1, milli Eskifjarðar og Eyvindarár við Egilsstaði, Stuðlalínu 2, milli Stuðla í Reyðarfirði og Eskifjarðar og Neskaupstaðarlínu 1, milli Neskaupstaðar og Eskifjarðar. Þeir liggja á milli loftlínu og tengivirkis í Eskifirði og Norðfirði.
Markmið verkefnisins var að auka orkuflutningsgetuna þannig að jarðstrengirnir við tengivirkið á Eskifirði og Norðfirði verði ekki takmarkandi heldur í samræmi við flutningsgetu loftlínanna sem þeir tengjast. Nýju jarðstrengirnir eru gerðir fyrir 132 kV spennu þó þeir séu nú reknir á 66 kV spennu. Með þessu er búið að undirbúa mögulega spennuhækkun á Eskifjarðarlínu 1 og Stuðlalínu 2.
3,5 km af jarðstrengjum
Undirbúningur á verkefninu hófst 2015 og var byrjað að skipta út jarðstrengjum við tengivirkið á Eskifirði 2016. Verkinu lauk í byrjun mánaðarins þegar Neskaupstaðarlína 1 var tekin í rekstur, eftir lagningu strengja í Neskaupstað.
Lokafrágangur á flugvellinum í Norðfirði dróst vegna veðurs en fyrstu vikuna í desember náðist að ljúka öllum frágangi í og við flugvöllinn enda veðurskilyrði óvenju góð miðað við árstíma.
Úttekt á yfirborðsfrágangi á strengleiðum fer fram næsta vor og þá verður unnið að úrbótum ef þörf þykir.