Mesti hiti ársins á Dalatanga í gær
Tuttugu stiga hiti mældist á Dalatanga seint í gærkvöldi og tæplega það á Eskifirði. Þetta er í annað skipti sem slíkur hiti mælist á landinu í nóvembermánuði. Hlýtt var í veðri á Austfjörðum í kvöld og í nótt.
20,1 stiga hiti mældist á Dalatanga um klukkan níu í gærkvöldi. Trausti Jónsson, veðurfræðingur, greinir frá því á bloggsíðu sinni svo virðist sem þetta sé hæsti hiti ársins á veðurstöðinni og þetta sé í annað skipti sem hiti mælist yfir 20 gráðum á landinu í nóvember. Fyrra skiptið var á Dalatanga fyrir nánast sléttum þremur árum.
Hitinn á Dalatanga varði entist framundir miðnætti en þar var hlýtt miðað við árstíma í nótt. Þar var einnig hvasst en hviður mældust um 30 m/s í gærkvöldi.
Svipaða sögu er að segja frá öðrum austfirskum veðurstöðvum. Hitinn varð tæpar 20 gráður á Eskifirði, og á Kollaleiru, Seyðisfirði, Norðfirði, Ljósalandi í Fáskrúðsfirði og á Vattarnesi fór hitinn í 15 gráður í gær og hélst um eða yfir 10 gráður í alla nótt.
Trausti bendir í pistli sínum að hiti sem þessi sé sjaldgæfur í nóvember og desember en ekki óþekktur. Hlýindin séu í neðri hita veðrahvolfsins en fátítt er að þau nái alla leið niður á yfirborð jarðarinnar. „Enginn sólarylur til að hjálpa til og oftast er verið að eyða varma í snjóbræðslu. Dugar lítt nema töluverður vindur og fjöll til að búa til þá lóðréttu hreyfingu og blöndun sem til þarf.“
Hlýindin verða hins vegar skammvin. Von er á ísköldu lofti frá Grænlandi sem tekið gæti yfir um miðja næstu viku.