Mikið ósætti á Stöðvarfirði með skerta þjónustu Landsbankans
Íbúar á Stöðvarfirði eru verulega ósáttir við að Landsbankinn ætli ekki að halda úti hraðbanka á staðnum, en hann hefur verið eina baknaþjónustan á staðnum síðan útibúi hans var lokað fyrir rúmum fimm árum.
Stjórn Íbúasamtaka Stöðvarfjarðar sendu bréf á Landsbankann um miðjan mánuð eftir að hraðbankinn á staðnum hafði verið bilaður í rúman mánuð. Í bréfinu var ástandinu harðlega mótmælt og þess krafist að nýr hraðbanki yrði settur upp fyrir þann gamla sem fyrst.
„Eftir lokun útibúsins á Stöðvarfirði og síðar Fáskrúðsfirði, hefur hraðbankinn verið íbúum mikilvægur enda langt í okkar útibú. Við teljum hraðbanka vera lágmarksþjónustu sem þó er nauðsynlegt að hafa í hverju bæjarfélagi. Nú hefur hraðbankinn staðið á stéttinni fyrir utan gamla bankahúsið í viku og var bilaður í mánuð þar á undan. Á meðan hafa nýjir hraðbankar komið á Reyðarfjörð og Fáskrúðsfjörð. Við krefjumst þess að hér verði áfram hraðbanki sem hægt er að nota allan sólarhringinn,“ segir í bréfinu.
Brekkan tekur við „bankaviðskiptum“
Íbúasamtökunum barst svar tveimur dögum síðar þar sem Stöðfirðingar voru beðnir afsökunar á þeim óþægindum sem bilun á hraðbankanum hafði í för með sér, en langur tími var skýrður með hrinu bilana í nokkrum hraðbönkum Landsbankans, ítrekaðar tilraunir til þess að koma hraðbankanum í lag skiluðu ekki árangri og tækið því úrskurðað ónýtt og var fjarlægt.
Í bréfinu segir að viðskiptavinir bankans sinni nú langstærstum hluta sinna viðskipta með rafrænum hætti, í netbanka eða farsíma. Hraðbankar séu framleiddir með það að markmiði að geta annað nokkur þúsund færslum á viku, en hafi notkun hraðbankans á Stöðvarfirði hefur verið lítil, yfirleitt tveir til þrír tugir færslna á viku.
„Landsbankinn hefur undanfarnar vikur unnið að lausn til að tryggja aðgengi íbúa á Stöðvarfirði og gesta þeirra að reiðufé. Við vildum finna framtíðarlausn þar sem rekstraröryggi væri tryggt og jafnframt væri í henni fólginn stuðningur við aðra þjónustu á staðnum. Landsbankinn hóf því viðræður við verslunina- og veitingastaðinn Brekkuna um að hann annist reiðufjárafgreiðslu fyrir bankann á Stöðvarfirði. Samningur um slíka afgreiðslu liggur nú fyrir en hann felur í sér að Stöðfirðingar og gestir þeirra geti notað debetkort til að taka út reiðufé í versluninni. Bankinn greiðir Brekkunni árlega þóknun fyrir að annast þessa þjónustu og því styður þetta fyrirkomulag við verslun á staðnum,“ segir í bréfi Landsbankans.
Við sættum okkur ekki við skerta hraðbankaþjónustu
Stjórn íbúasamtakanna var ekki ánægð með þá lendingu sem Landsbankinn leggur til og segir í bréfi sem sent var á móti á dögunum að þjónustan sem Landsbankinn ætli sér að bjóða íbúum sé óviðunandi.
„Við sættum okkur ekki við skerta hraðbankaþjónustu. Brekkan er með ákveðinn opnunartíma og hraðbankaþjónustu á að vera hægt að sækja allan sólarhringinn. Setur Landsbankinn einhverjar kvaðir á lágmarksopnunartíma á Brekkunni? Það er frábært að þið viljið styðja við þjónustu í bænum en að skerða lágmarksþjónustu teljum við ekki vera stuðning, betra væri að greiða Brekkunni eða Kaffi Söxu leigu á plássi fyrir nýjan hraðbanka. Eftir að útibúinu var lokað var staðsetning hraðbanks úr leið þar sem ferðamenn labba ekki svo langt en þúsundir ferðamanna ganga hjá Brekkunni og Kaffi Söxu á hverju sumri.
Við erum fullkomnlega andsnúin þessari ákvörðun Landsbankans og lítum svo á að hann sé að bregðast hlutverki sínu sem fyrirtæki í almannaþjónustu, einkum og sér í lagi í ljósi þess að hann er ríkisfyrirtæki,“ segir í bréfi frá stjórn íbúasamtakanna.
Ljósmynd: Björgvin Valur Guðmundsson
