Mikil ánægja meðal fjarnema við ME
97% fjarnema við Menntaskólann á Egilsstöðum lýsa yfir ánægju sinni með námið í kennslukönnun skólans fyrir nýliðna haustönn. Spannafyrirkomulagið er það sem nemendurnir lýsa mestri ánægju með.Um 51% segja fjarnámið vera mjög gott og 46% gott. Ánægja með fjarnámið hefur aukist þó nokkuð frá árinu 2013 enda hefur nokkur áhersla verið lögð á það.
Spannakerfið er það sem flestir nefna þegar þeir eru spurðir að því hvað sé það besta við fjarnámið. Spurt var að því í opinni spurningu og vísaði helmingur svara til spannanna.
Hverri önn er skipt upp í tvær spannir og er þá lögð mikil áhersla á ákveðin fög á stuttum tíma.
Fjarnemarnir hafa fleira gott um námið að segja. Svartími og endurgjöf kennara þykir almennt góð, 89% eru sammála því að skipulag kennslunnar sé gott og námsgögnin þykja góð.
Álagið er nokkuð í náminu en flestir telja það hæfilegt. Konur eru 75% þeirra sem svöruðu kennslukönnuninni og flestir eru í einum áfanga. 254 fjarnemar voru í ME á haustönn og var svarhlutfallið 54%.
