Minnka tilgreint verndarsvæði í byggðinni á Djúpavogi
Samþykkt hefur verið að minnka það svæði á Djúpavogi sem lengi vel hefur verið sérstaklega tilgreint sem verndarsvæði í byggð. Þar með fellur meðal annars gamla kirkjan í bænum út af því svæði
Umhverfis- og framkvæmdaráð Múlaþings samþykkti tillögu þessa efnis um síðustu mánaðarmót og heimstjórn Djúpavogs gerði engar athugasemdir við tillöguna í síðustu viku. Sveitarstjórn mun því að öllum líkindum endanlega samþykkja þegar sú fundar síðar í dag.
Skiptar skoðanir hafa verið um þessi svokölluð „verndarsvæði í byggð“ á Austurlandi en það var á Djúpavogi 2017 sem fyrsta slíka svæðið á landsvísu var staðfest en lög þess efnis voru fyrst samþykkt á Alþingi 2015. Þeim lögum ætlað að tryggja vernd og varðveislu þeirra svæða í byggð sem hafa sérstakt gildi vegna sögu, minja, bygginga eða annars þess sem sérstaklega merkilegt getur talist í byggðasögulegu samhengi.
Gagnrýnisraddir á slík svæði hafa gjarnan komið frá íbúum hvers hús eða eignir falla innan umræddra svæða en stórhertar reglur gilda um allar breytingar sem ráðgerðar eru á húsnæði eða landi innan þeirra marka. Það var og reyndin á Djúpavogi þar sem stöku íbúar voru ósáttir við að geta ekki framkvæmt eitt og annað sem íbúar í öðrum hverfum fá jafnan frjálsar hendur með. Innan slíkra svæða er óheimilt að breyta eða byggja við húsnæði eða raska görðum eða útliti lóðar án sérstaks leyfis frá bæjaryfirvöldum sem í þessu tilfelli er Múlaþing.
Breytingin nú felur í sér að afmörkun svæðisins verður minnkað úr 7,5 hekturum áður í 6,9 hektara nú en það merkir að ein þrjú íbúðarhús auk hinnar gömlu Djúpavogskirkju verða ekki lengur innan verndarsvæðisins. Nánar tiltekið er suður og suðvesturhluti afmörkunar felldur út en á því svæði eru auk kirkjunnar lóðirnar Steinar 1, Steinar 3 og Hammersminni 2.
Verndarsvæðið á Djúpavogi eftir að breytingarnar ganga í gegn sjást á þessari mynd frá verkfræðistofunni Eflu.
