Mótorhjólaslys í Mjóafirði
Slys varð um miðjan dag í gær á Mjóafjarðarvegi þegar ökumaður bifhjóls féll þar í beygju með þeim afleiðingum að hjólið féll ofan á viðkomandi.
Viðkomandi ökklabrotnaði og hlaut skrámur en samkvæmt upplýsingum lögreglu sem á staðinn kom voru meiðslin ekki alvarleg. Hjálpaði þar eflaust til að í bifreið á eftir hjólinu þegar slysið átti sér stað reyndust vera tveir læknar á ferðalagi sem komu ökumanni bifhjólsins strax til aðstoðar meðan beðið var sjúkrabíls.
Viðkomandi var í kjölfarið fluttur undir læknishendur í sjúkrahúsinu í Neskaupstað.
Á meðfylgjandi mynd frá Visit Austurland má sjá tiltölulega krappar beygjurnar upp á Mjóafjarðarheiðina en þar átti slysið sér stað.
