Ökumaður sektaður fyrir að aka um með farþega á pallbíl
Lögreglan á Austurlandi sektaði níu ökumenn fyrir of hraðan akstur í síðustu viku. Ökumaður var sektaður fyrir að hafa farþega á palli bifreiðar, viku eftir að slíkur farþegi slapp lítið slasaður úr óhappi.Þetta kemur fram í dagbók lögreglunnar á Austurlandi fyrir nýliðna viku en alls voru 100 verkefni skráð í bókina, flest úr umferðinni.
Níu voru teknir við of hraðan akstur, fjórar tilkynningar bárust um að ekið hefði verið á búfé og fjögur umferðaróhöpp urðu þó án mikilla meiðsla.
Aðfaranótt sunnudags kviknaði í bifreið sem ekið hafði út af. Mikil mildi þykir að ökumaður og farþegar hafi sloppið lítið slasaðir frá því óhappi.
Ökumaður var sektaður fyrir að aka með farþega á palli bifreiðar. Í tilkynningu lögreglu er minnt á að ekki þurfi að hafa mörg orð um hve hættulegt það geti verið. Vikuna á undan féll farþegi af palli bifreiðar sem ekið var innanbæjar. Mildi er talið að ekki hafi þar orðið stórslys en sá var fluttur á Sjúkrahúsið í Neskaupstað til aðhlynningar.
Þá hafði lögreglan afskipti af ferðalöngum sem tjaldað höfðu utan tjaldsvæða. Þeir tóku vel upp í að færa sig með sitt hafurtask á tjaldsvæði þegar þeim var bent á það væri skylt lögum samkvæmt.
