Pantaði á annað hundrað raftækja í nafni álversins til nota í eigin þágu
Héraðsdómur hefur dæmt fyrrum starfsmann Alcoa Fjarðaáls í 12 mánaða skilorðsbundið fangelsi og til endurgreiða fyrirtækinu tæpar tíu milljónir króna sem er andvirði raftækja sem hann pantaði í nafni fyrirtækisins til eigin nota.
Ein pöntun er frá árinu 2008 en annars eru brotin framin á árunum 2011-2015. Um er að ræða 145 raftæki frá þremur innlendum birgjum. Í ákæru segir að maðurinn hafi frá upphafi ætlað tækin í eigin þágu.
Á listanum má meðal annars finna yfir 20 heyrnartól, annað eins af hljóðnemum, 7 iPad spjaldtölvur, 4 iPhone farsíma, 6 snjallúr, myndavélabúnað, fartölvu, ljósmyndaramma, vekjaraklukku,
Maðurinn játaði brot sín greiðlega fyrir dómi og var samvinnufús við rannsókn málsins en það er talið honum til tekna við ákvörðun refsingar. Þá hefur hann ekki áður sætt refsingu. Á móti áttu brotin sér stað um langt tímabil, tilvikin voru fjölmörg og vörðuðu verulegri upphæð.
Maðurinn var því dæmdur í 12 mánaða fangelsi skilorðsbundið til þriggja ára, til að endurgreiða Fjarðaáli 9,7 milljónir með vöxtum auk hálfrar milljónar í málskostnað og skipuðum verjanda sínum tæpar 250 þúsund krónur.
